Framkvæmdir við Hlemmtorg og uppbygging Borgarlínu

Heildarkostnaðaráætlun verkefnisins er 1.190 milljónir króna, þar af er áætlaður kostnaður Reykjavíkurborgar 500 milljónir króna. Um sameiginlegt framkvæmdaútboð Reykjavíkurborgar, Betri samgangna og Veitna er að ræða. 

Framkvæmdin felur meðal annars í sér: 

• Endurgerð gatnamóta Snorrabrautar og Hverfisgötu. 

• Endurgerð götukafla á Snorrabraut, frá Bríetartúni að Hverfisgötu. 

• Gerð torgsvæðis norðan borgarlínuáss og gerð torgsvæðis sunnan borgarlínuáss frá Snorrabraut og austur fyrir Hlemm mathöll. 

• Gerð Borgarlínu um torgsvæði Hlemms og uppsetningu tveggja stoppistöðva Borgarlínu á svæðinu. 

• Endurnýjun fráveitulagna, vatnsveitu- og hitaveitulagna, raflagna, fjarskiptalagna og umferðarljósa. 

Almenningssamgöngur verða eina akandi umferðin um Hlemmtorg. Áhersla er lögð á virka og vistvæna ferðamáta.

Bætt aðstaða fyrir almannasamgöngur, gangandi og hjólandi 

Með framkvæmdunum verður Hlemmtorg mótað sem sterkur borgarkjarni með auknu rými fyrir gangandi og hjólandi og bættri aðstöðu fyrir almenningssamgöngur sem verða eina akandi umferðin um torgið. Umhverfið í kring verður gönguvænna og meira aðlaðandi fyrir fjölbreytt mannlíf. Þá verður leið hjólandi fólks stórbætt um svæðið ásamt því að sköpuð verður hágæða aðstaða fyrir hjólreiðar á svæðinu m.a. aðstaða til viðgerða og geymslu hjóla. 

Lögð er mikil áhersla á að gera svæðið gróðursælt með fjölbreyttum gróðri en þar verða einnig ofanvatnsbeð, sem eru sérstök gróðurbeð sem taka á móti ofanvatni. Nú þegar er búið að framkvæma nokkra áfanga á Hlemmi  sem hefur strax gefið svæðinu nýja ásýnd með fallegu heildaryfirbragði torgs, setsvæðum og gróðri. 

Nánari upplýsingar um verkefnið má finna á upplýsingasíðu um Hlemm á vef Reykjavíkurborgar.